Vrasja e 22 vjeçarit Marvi Mihali tronditi opinionin publik në gushtin e 2017 dhe la plagë të pashëruar tek dy prindërit e tij që e kishin djalë të vetëm. Ai u vra për një karikues telefoni nga kushërinjte Devi dhe Eugen Bitraj.
Kur u publikuan pamjet e vrasjes në TCH të gjithë bënë çudi se roja e kazinosë që pa gjithë skenën e krimin nuk reagoi por qendroi me duart e kryqëzuara.
Në seancën e sotme gjyqësore ka dhënë dëshminë e tij pikërisht Besim Sokolaj, i cili ka qenë prezent kur ka ndodhur krimi. Ai punonte roje në një kazino.
Sokolaj tha se nuk e kishte parë momentin e vrasjes së Marvit, por vetëm një përleshje mes disa të rinjve.
Sokolaj sqaroi se nuk kishte ndërhyrë pasi nuk donte të rrezikonte vendin e punës. Kjo dëshmi solli dhe reagimin e prindërve të Marvi Mihalit, të cilët thanë se ndërhyrja e rojes mund t’i kishte shpëtuar jetën djalit të tyre.
