Kevin Connolly është Marshalli amerikan që i kishte vënë detyrë vetes për të kapur të arratisurit në Uashington. Nga të gjitha arrestimet që Connolly ka bërë në karrierën e tij 22vjeçare me Shërbimin e Marshallëve, momenti më kulminant ka qenë shtatorin e kaluar, kur ai ka arrestuar shqiptarin në kërkim ndërkombëtar, Marjan Rrokun.
Iu desh gati gjashtë vjet për të arritur në gjurmët e Rrokut, një ish-polic i SHIK-ut shqiptar i cili ishte dënuar për vrasjen e një vajze 16-vjeçare, Alda Canaj, dhe nënës së saj, Mbarimes, në vitin 2001 në Shqipëri.
Rroku u dënua për vrasje, pasi ai iku në Shtetet e Bashkuara, dhe u dënua në mungesë me burgim të përjetshëm.
Kur Connolly filloi kërkimiet e tij për Rrokun në vitin 2004, nuk kishte shumë informacione, vetëm disa thashetheme që Rroku mund të ishte larguar në Shtetet e Bashkuara apo në Kanada.
Connolly gjithashtu kishte arsye për të besuar se Rroku kishte falsifikuar dokumentet kështu që edhe nëse ishte fshehur në SH.B.A., Connolly supozoi se shqiptari kishte ndryshuar emër.
Kur Marshalli u takua me motrën e Alda Canajt, Ornela Canajn, për të diskutuar mbi çështjen në vitin 2005, ai i premtoi se do të bëjë atë që mundet, por i shpjegoi se Rroku nuk mund të gjendej. Me kalimin e kohës, Connolly u investua edhe më shumë për të zbardhur këtë rast.
Ai vazhdoi të kontaktonte me Ornelën, që jetonte në Virxhinia dhe tani është shtetase amerikane. Gjatë kësaj periudhe, Marshalli e kuptoi se sa e rëndësishme ishte për familjen Canaj që Rroku të dilte para drejtësisë.
Përfundimisht, në gjurmët e Rrokut Connolly ra pasi kishte marrë disa këshilla të rëndësishme duke parë një episod të filmit “America’s Most Wanted”.
Ishte pikërisht kjo shtysë që e dërgoi Connolly në New York City, dhe pas hetimeve të mëtejshme, ai mbërriti në pragun e derës së Rroku në Queens County një mëngjes në shtatorin e kaluar. I arratisuri jetonte në një apartament në bodrumin e një pallati me gruan e tij dhe një fëmijë të vogël.
Gruaja e Rrokut, e cila e njihte vetëm me pseudonimin e tij, nuk e dinte se ai ishte i kërkuar për vrasje. Një ditë pasi bëri arrestimin, ai shkoi në pjesën veriore të Virxhinias për të takuar Ornelën, motrën e Aldës.
Ai i kishte çuar asaj një dhuratë, prangat që përdori kur kishte çuar Rrokun në paraburgim.
