Një person ka goditur me thikë disa persona në qendër të qytetit të Marsejës, në Francë, e më pas është vrarë nga policia. Sipas gazetës lokale “La Provence”, agresori ka sulmuar katër persona duke plagosur dy prej tyre. Ngjarja ka ndodhur në qendër të qytetit, pak hapa larg rrugës historike “Canebiere”.
Kur ka parë që po vinin forcat e policisë, agresori ka nxjerrë një pistoletë dhe ka tentuar të hapë zjarr ndaj tyre, gjë që nuk ka mundur ta bëjë pasi efektivët kanë reaguar me shpejtësi duke e vrarë. Gjatë të shtënave, ka mbetur i plagosur lehtë edhe një kalimtar i rastit. Identiteti dhe motivet e agresorit nuk bëhen të ditura, ndërsa thuhet se nuk ka lidhje me akte terroriste.
