Si pjesë e një marrëveshje paqeje, presidenti i SHBA Donald Trump pretendon se homologu i tij ukrainas, Volodymyr Zelensky është i gatshëm t’i dorëzojë Krimenë Rusisë, kjo pavarësisht refuzimeve të mëparshme të Kievit për një propozim të tillë.
Pyetjes se nëse mendon që presidenti ukrainas është gati të dorëzojë kontrollin e gadishullit të tij jugor, i cili u aneksua ilegalisht nga Rusia në vitin 2014, Trump u përgjigj: “Unë mendoj se po”.
Këto komente, presidenti Trump i bëri para gazetarëve pasi u kthye nga Vatikani, ku zhvilloi një takim të shkurtër me Zelenskyn përpara funeralit të Papa Françeskut.
Sipas presidentit amerikan, takimi “shkoi mirë”, ndërsa u fol “shkurt edhe për Krimenë”. Sipas Trump, Zelensky dukej më i qetë, duke kujtuar kështu takimin e tensionuar mes tyre në Zyrën Ovale.
Ukraina ka refuzuar në mënyrë të përsëritur të bëjë ndonjë lëshim territorial, duke theksuar se çështjet në lidhje me tokën duhet të diskutohen vetëm pasi të arrihet një armëpushim.
As Zelensky dhe as presidenti rus Vladimir Putin nuk u janë përgjigjur publikisht komenteve të fundit të Trump.
