Këtë të martë në ambientet e Kryeministrisë në Tiranë është zhvilluar ceremonia për firmosjen e marrëveshjes mes qeverisë shqiptare dhe Turqisë për blerjen e flotës së dronëve “Bayraktar”.
Sipas kryeministrit Edi Rama dronët e blerë nga Turqia janë teknologjia më e lartë e fluturimeve për misione ushtarake, policore dhe civile, në funksion të sigurisë kombëtare.
Rama tha se më shumë se 30 persona do përzgjidhen me ndihmën e kompanisë ‘Bajraktar’ dhe do përgatiten për të marrë funksionin e qendrës së kontrollit bazën ajrore të Kuçovës.
“Me këtë marrëveshje nuk po sjellim këtu në Shqipëri teknologjinë më të mirë në këtë fushë, por kështu do sjellim në Shqipëri një fushë të re njohurish. Është shumë mirë që marrëveshja nuk është vetëm për të blerë dronët por ka të bëjë edhe me ndërtimin e një ure mes FA tona dhe kompanisë ‘Bajraktar’ që do kujdeset për trajnimin e njerëzve. Më shumë se 30 persona që do përzgjidhen me shumë kujdes me ndihmën e kompanisë ‘Bajraktar’ dhe do përgatiten për të marrë funksionin e qendrës së kontrollit që do jetë objekt i teknologjisë më të lartë në bazën ajrore të Kuçovës”, tha Rama.
