Albin Kurti pritet të jetë kryeministri i ri i Kosovës. Lidhur me këtë fakt, ish-kryeministri Sali Berisha ka thënë se fitorja e tij sëbashku me LDK në koalicion është një fitore për Kosovën.
I ftuar në Zonë e Lirë, Berisha tha se Kurti është një “kafshë politike” në kuptimin pozitiv të fjalës.
“Politikan me fibër të fortë politike, kafshë politike jo në kontekstin negative të fjalës. Ka arritur me talentin, vendosmërinë, instinktet e tij, dy herë radhazi të dalë parti e parë pa ndihmën e asnjë njeriu. Dhe sëbashku me Vjosa Osmanin e LDK unë e kam vlerësuar si ndryshim historik. Fitoi Kosova dhe i kam deklaruar se zgjedhje historike” tha Berisha.
Sa i përket një krahasimi me Tsiprasin në Greqi dhe nëse Kurti mund të kishte të njëjtin fat politik me të, Berisha u shpreh se krahasimi mes tyre nuk qëndron.
“Tsipras është rritur në krahët e një miliarderi ndërsa Kurti mbështetës kryesor ka patur Adem Demaçin për sa kohë ai ishte aktiv” tha ish-kryeministri.
Ai nuk e sheh si një fenomen të ri Albin Kurtin pasi “ai ka një karrierë politike të gjatë, është njeri i farkëtuar në burgje, rezistencë dhe protesta”
Lidhur me një marrëveshje të mundshme me Albin Kurtin pasi ky i fundit i bëri një vizitë në zyrë Berishës, ai e mohoi diçka të tillë dhe tha se ata i bashkojnë mendime të njëjta lidhur me cështjen kombëtare.
“Unë nuk kam asnjë marrëveshje me Kurtin. Kemi patur mendime të njëjta për një akt të papranueshëm, për ndryshimin e kufijve të Kosovës….Unë kam shprehur simpatinë time të plotë për kauzën e Lëvizjes Vetëvendosje për bashkimin kombëtar” tha ndër të tjera Berisha. /Opinion.al
