Presidenti afgan, Ashraf Ghani, ka vënë në dyshim një ndër kushtet kryesore për negociatat ndërmjet qeverisë afgane dhe talebanëve, pasi këta të fundit nënshkruan një marrëveshje historike me SHBA-në që ka për qëllim fundin e luftës 18-vjeçare në Afganistan.
Ghani, ka deklaruar sot se ndryshe nga çfarë thuhej në marrëveshjen e nënshkruar më 29 Shkurt, qeveria e tij nuk ka dhënë asnjë zotim për lirimin e 5,000 të burgosurve talibanëve.
“Nuk ka asnjë zotim për lirimin e 5,000 të burgosurve”, tha Ghani, duke shtuar se “kjo është e drejtë dhe e vullnetit të popullit afgan. Kjo mund të jetë në agjendën për bisedime ndër-afgane, por nuk mund të vendoset si parakusht për bisedime”.
Në marrëveshjen e 29 shkurtit, e cila u cilësua si historike, SHBA-ja ra dakord që të tërheqë trupat amerikane nga Afganistani brenda 14-muajsh, nëse talebanët i përmbahen marrëveshjes.
Sipas kësaj marrëveshjeje, të dy palët do të reduktojnë dhunën në Afganistan ndërsa talebanët po ashtu janë zotuar që të ndalojnë operimin e grupeve terroriste, si Al-Kaida, në territoret që ata kontrollojnë në vend.
Lufta në Afganistan nisi në vitin 2001, disa javë pas sulmeve të 11 shtatorit në SHBA. Asokohe, presidenti amerikan, George W.Bush kishte urdhëruar nisjen e bombardimeve dhe më pas pushtimin e Afganistanit./Opinion.al
