Arrihet marrëveshja prej 19 milionë dollarësh për të mbyllur denoncimin e një grupi grash, viktima të ngacmimeve seksuale nga ish regjisori i njohur hollivudian, Harvey Weinstein.
Fondi prej 19 milionë dollarësh nuk do të ndahet vetëm për gratë dhe vajzat që pësuan abuzime seksuale, por edhe për ish nëpunësit e kompanisë së Weinstein që kanë përjetuar “një ambient jo miqësor në punë dhe që janë diskriminuar”.
Marrëveshja iu mundëson viktimave të paraqesin pretendimet për dëmshpërblim që mund të variojnë nga 7,500 deri në 750, 000 dollarë.
Ish-producenti i filmave Harvey Weinstein është shpallur fajtor për dy akuza në gjyqin ndaj tij për sulme seksuale. Më shumë se 80 gra, përfshirë aktore të famshme, e kishin akuzuar atë për abuzime seksuale që shtrihen pas në kohë me dekada.
Skandali i bujshëm lindi në tetor të vitit 2017 kur “New York Times” publikoi një histori që detajonte dekada akuza për ngacmime seksuale në drejtim të Harvey Weinstein.
Aktoret Rose McGowan dhe Ashley Judd ishin mes të parave që dolën hapur kundër tij. Ato e akuzonin se ai i detyronte ato ta “masazhonin” , ta shihnin lakuriq, të kryenin akte seksuale në zyrë, ndërsa në këmbim u premtonte karrierë, pushtet ose para. Nga ana e tij, producenti bëri një “mea culpa” duke pranuar se kishte shkaktuar shumë dhimbje, por mohoi akuzat.
Furia kundër Weinsteinit çoi në krijimin e asaj që u quajt lëvizja “#MeToo”, që pa qindra gra të akuzonin meshkuj të profilit të lartë në biznes, qeveri dhe mjedise të tjera për abuzime seksuale dhe ngacmime.
Gjyqi ka marrë një vëmendje të lartë publike pasi Weinstein është një prej producentëve më të famshëm të Hollywoodit. Ai ka punuar me një sërë filmash që kanë fituar çmime prestigjioze, përfshirë këtu “Shakespeare in Love”, “The King’s Speech” dhe “The Artist”. Filmat e prodhuar prej tij kanë siguruar më shumë se 81 çmime “Oscar” që prej vitit 1999, dhe ai cilësohej si “Zoti” i tyre./Opinion.al
