Në përfundim të tryezës së Reformës Zgjedhore, palët kanë gjetur marrëveshje për 3 nga pikat e diskutuara në mbledhjen e gjatë të Këshillit Politik.
Sipas deklaratës së bërë në media, nga Bashkryetari i Reformës, Damian Gjiknuri, në mbledhjen e sotme është dakordësuar për shkurtimin e periudhës zgjedhore, pranimin e kuotës gjinore ku një në tre kandidatë të jenë gra dhe financimin e fushatës.
Sipas Gjiknurit u pranua të shkurtohet periudha zgjedhore në afatet 15 Prill- 15 Maj ose 15 Tetor- 15 Nëntor. Njëkohësisht në çështjet e kuotës gjinore, Gjinkuri tha se në listat zgjedhore 30% të jenë gra.
Lidhur me financimin, Gjiknuri tha:
“Ramë dakord për financimin miks, ku do të kemi një finacnim nga paraja publike dhe pjesa tjetër nga donacione private, por duke ulur në mënyrë drastike nivelet e raportit 1 me 10 për ta ulur në një raport më të pranueshëm. Qeveria ka marr përsipër të shtojë vlerën totale që do të japë për fushatën e ardhshme në mënyrë, që të rritet pesha edhe e financimit publik. Akoma kemi disa çështje që na ndajnë këtu, por përgjithësisht kapitulli i financimit të fushatës ka marrë dakordësinë, me përjashtim të disa elementëve kufizues që ka kërkuar opozita jashtëparlamentare që jemi duke i adresuar. Kemi nje progres, që nuk është përfundimtar, por është një hap i mirë”.
Ndërkohë, përfaqësuesi i opozitës në Këshillin Politik të Reformës Zgjedhore, Oerd Bylykbashi tha se palët kanë rënë dakord për disa çështje teknike të Reformës por nënvizoi se këto nuk janë çështjet kryesore.
Megjithëse palët ranë dakord për periudhën zgjedhore dhe për kuotat gjinore, Bylykbashi deklaroi në fund të takimit se problematika kryesore është garantimi i votës së lirë dhe sekrete.
Fakti që ky ka ardhur si rekomandim nga ODIHR tha Bylykbashi tregon se kjo ka munguar në Shqipëri.
“Problematikat kryesore të procesin zgjedhor nuk janë këto. Ajo që duhet të garantojmë ne është mbrojtja e zgjedhësit shqiptar që ai ta hedhë votën e lirë dhe në sekret të plotë, rekomandim shumë i rëndë që ODIHR pasi konstaton që liria e votës cenohet rekomandohet të merren masa për ta mbrojtur. Në diskutimin që do të kemi në vijim janë masat që rregullojnë organet ligj zbatuese për të mbrojtur sekretin e votës, garantimin që kutia nuk mbushet, e më pas me çështje të tjera, por këto janë problemi real, që vota është e vërtete dhe numërohet pa manipulim. Çështjet e tjera janë rreth këtij boshti. Kjo është sfida e madhe që na pret për të cilin do të kërkojmë konsensus dhe nga i cili nuk do të heqim dorë.”- tha ai. /Opinion.al
