Në një interviste të shkurtër për “BBC World Service”, Kryeministri i Kosovës, Albin Kurti, i cilësoi të kënaqshme rezultatet e marrëveshjes me Serbinë për reciprocitetin.
I pyetur nga gazetari se a është i lumtur për këtë marrëveshje, kryeministri Kurti tha:
“Po ne kemi pas bisedime ne Bruksel që nuk kanë qenë të lehta por rezultatet janë të kënaqshme sepse tani kemi reciprocitet mes Kosovës dhe Serbisë, në kuptimin e lëvizjes së lirë, për qytetarët e të dyja vendeve. E falënderoj Borrellin, Lajçak dhe Escobar për punën e zellshme në Prishtinë dhe Beograd, në të njëjtën kohë i falënderoj qytetarët e Kosovës për mbështetjen”, tha Kurti.
Ai pohoi se pas kësaj marrëveshjeje, qytetarët serbë do të kenë dy muaj kohë për të pajisur automjetet e tyre me targa të Kosovës.
“Ju kemi dhënë qytetarëve serbë dy muaj kohë për t’u pajisuar me targat e Republikës së Kosovës….Shpresoj që deri në tetor s’do të shohim automjete me targa që s’janë valide”, u shpreh ai ndër të tjera./Opinion.al
