Ish-kryeministri Sali Berisha ka reaguar për marrëveshjen me PS për ngritjen e komisioneve hetimore dhe të nënkomisionit për reformat.
Nga dritarja e banesës, Berisha tha se opozita do të bej gjithçka për të mbrojtur të drejtat e saj kushtetuese.
Ai theksoi se PD nuk do e bojkotojë parlamentin, pasi në këtë mënyrë do të përfitonte mazhoranca. Teksa akuzoi kryeministrin për korrupsion, ai tha se Rama ka frikë nga komisionet hetimore.
“Këto ditë në parlament është bërë dialog në mënyrë që të drejtat e opozitës të respektohen.
Dua të sqaroj ju dhe çdo shqiptar se nuk është opozita ajo që ka shkelur të drejtat kushtetuese, as të vetat, as të kujt tjetër. Është Edi Rama, i cili nuk pranon të respektojë të drejtat kushtetuese.
Në këto rrethana ai ka vetëm një qëllim dhe ky qëllim është që opozita të bojkotojë parlamentin.
Sepse, duhet të jemi realistë, në mënyrë makabër ai fitoi më shumë se kushdo tjetër nga bojkoti i parlamentit nga opozita. Mirëpo unë i them sot Edi Ramës këtu para jush dhe në emër tuaj se opozita nuk braktis parlamentin, por opozita do bëjë çdo gjë për të drejtat e saj kushtetuese në parlament dhe kudo. Prandaj dhe Edi Rama, ti ke frikë dhe tmerr nga komisionet hetimore. Nuk ka forcë në botë që të shpëton prej tyre. Le të vijë kushdo në mbrojtje tënde, ti do përfundosh para atyre komisioneve sepse ke vjedhur këtë komb, këtë vend sa askush tjetër në histori”, tha Berisha.
