Këtë të hënë Kuvendi i Shqipërisë ka filluar sesionin e ri parlamentar. Gjatë seancës, kreu i Kuvendit Gramoz Ruçi i ka dhënë përgjigje interesit të deputetëve të opozitës për votimin në Kuvendtë marrëveshjes me Phizer për vaksinën anti-COVID.
Ruçi tha se kjo është një marrëveshje dy palëshe që Pfizer nënshkruan me të gjitha shtetet që zgjedhin të marrin vaksinën,e cila nuk do të botohet në shtyp, as në rrjetet përkatëse.
Më tej ai shtoi se deputetët mund të njihen me të në komisionet respektive duke theksuar se Shqipëria është e detyruar ta zbatojë marrëveshjen për sa kohë jemi dy palë.
“Unë bëra një propozim dhe thashë tre kryetarët e grupeve janë dakord. S’kemi të bëjmë me tallje të ekzekutivit. Të dyja aktet e para normative kishin mbërritur në parlament. Në konferencë të kryetarëve kam thënë se nuk do të botohet as në shtyp dhe as në rrjetet përkatëse sepse është marrëveshje. Janë botuar në komisionet respektive dhe deputetët janë të lutur të ulen dhe të njihen me ta. Kjo nuk është kërkesë për ne por për të gjithë parlamentet. Jemi të detyruar ta zbatojmë për sa kohë jemi dy palë”, u shpreh ai.
Gjatë seancës plenare, Ruçi lexoi edhe një pjesë nga akti normative për autorizimin e procedurës për lejimin e hyrjes dhe administrimin e vaksinës anti-COVID në Shqipëri.
“Akt normativ nr. 1 për furnizimin përmes kompanisë X, autorizimin e procedurës për lejimin e hyrjes dhe administrimin e vaksinës anti-COVID në Shqipëri dhe përdorimin e tyre nga popullata. Akt normativ për dhënien e autorizimit me prodhuesit e vaksinës anti-COVID që janë certifikuar nga departamenti amerikan. Çfarë sekreti ka këtu. Çfarë do të shikojmë”, tha Ruçi.
