Zëvendësministri i Jashtëm i Iranit, Abbas Araqchi është takuar me përfaqësuesit e Britanisë, Francës, Gjermanisë, Rusisë dhe Kinës, për të diskutuar lidhur me zbatimin dhe shpëtimin e marrëveshjes bërthamore të vitit 2015, ndërmjet Teheranit dhe fuqive botërore.
“Nuk mund të them se kemi zgjidhur gjithçka, por mund të them se në takim janë bërë shumë zotime”, tha Araqchi për Reuters, pas takimit që u zhvillua sot në Vienë.
Takimi në Vienë u thirr si pasojë e përshkallëzimit të tensioneve ndërmjet Iranit dhe Shteteve të Bashkuara dhe aleatëve të saj.
Sipas marrëveshjes së vitit 2015, Irani do të kufizonte programin e tij bërthamor, në këmbim të lehtësimit të sanksioneve. Por, presidenti i SHBA-së, Donald Trump u tërhoq nga kjo marrëveshje vitin e kaluar dhe rivendosi sanksione ekonomike ndaj Teheranit.
Franca, Gjermania dhe Britania janë munduar që ta shpëtojnë marrëveshjen dhe kanë propozuar një sistem të komplikuar të shkëmbimit financiar, që është krijuar për të siguruar lehtësim ekonomik për Iranin e goditur nga sanksionet amerikane.
Megjithatë, Irani është ankuar se palët që vazhdojnë të jenë ende në këtë marrëveshje, kanë dështuar që të zbusin efektet e sanksioneve të SHBA-së mbi industrinë bankare dhe të naftës./Opinion.al
