Erion Veliaj ka folur në emisionin “Debati në Channel One” për marrëdhëniet e tij me Saimir Tahirin. Veliaj ka uruar që Tahiri ta fitojë gjyqin, ndërsa thotë se ai nuk ka qenë kurrë konkurrenti i tij brenda Partisë Socialiste.
“Saimiri ka një proces në gjykatë. Një gjë që unë nuk kam bërë kurrë është që unë të fus hundët se çfarë pretendojnë gjykatat e këtij vendi. Edhe për veten time, për çdo gjë kam shkuar në gjykatë. Kam fituar 8-0 të gjitha gjyqet për shpifje ndaj meje. Uroj shumë që dhe Saimiri të fitojë. Ai nuk ka qenë asnjëherë konkurrenti im brenda PS, kjo është e gjitha një legjendë urbane”, është shprehur Veliaj.
Më tej, ai ka thënë se janë komshinj e madje komunikojnë herë pas here. Veliaj thotë se brenda qeverisë kanë pasur marrëdhënie shumë korrekte, pavarësisht profileve të ndryshme.
“Kemi pasur një marrëdhënie shumë korrekte në qeveri, sigurisht në profile shumë të ndryshme kështu që ato dy vite që unë kam qenë në qeveri kemi pasur një raport shumë korrekt dhe secili në ngastrën e vet. Marrëdhëniet tona personale kanë qenë të shkëlqyera. Pasi ndodhi kjo kam komunikuar, jemi dhe komshinj. Kjo historia e rivalitetit dhe debatit kanë qenë të gjitha legjenda urbane. Nuk mbaj mend të kemi debatuar ndonjëherë. Shpesh herë kemi bërë batuta me njëri tjetrin për këtë konkurencën që më shumë e ëndërronin të tjerët sesa ekzistonte”, është shprehur Erion Veliaj./Opinion.al
