Pas kërkesës së kreut të Këshillit të Lartë të Prokurorisë, Gent Ibrahimi për verifikimin e fakteve lidhur me prokurorin Arjan Ndoja ka reaguar Prokuroria e Përgjithshme.
Në një njoftim për mediat, kryeprokurorja Arta Marku thotë se verifikimi i fakteve të bëra publike në rastin e prokurorit Ndoja kanë nisur që ditën e djeshme. Megjithatë fakti që kërkesa e KLP për verifikim u dërguar sot tregon për një diskordancë mes institucioneve më të larta të prokurorisë.
“Verifikimet konsistojnë në mbledhjen e të dhënave për shkeljen e rregullave të papajtueshmërisë me funksionin e magjistratit, parashikuar në nenin 103 shkronja“a” të ligjit 96/2016 “Për statusin e gjyqtarëve dhe prokurorëve në Republikën e Shqipërisë” thuhet në njoftimin e prokurorisë.
Gjatë një interviste për A2 ditën e djeshme prokurori Arjan Ndoja pranoi se ai zhvillonte aktivitetin e konsulencës ligjore, gjë që është e ndaluar për një prokuror në detyrë.
Nga njoftimi i prokurorisë rezulton se verifikimi për Ndojën ka nisur vetëm për këtë shkelje të dyshuar por bën çudi fakti se prokuroria nuk ka nisur një verifikim për dokumentet që u raportuan se u gjetën në bagazhin e makinës së prokurorit, ku pëfshiheshin fashikuj dosjesh, si dhe për faktin se ai shoqërohej me persona me të shkuar të dyshimtë. /Opinion.al
