Profesori Mark Marku me anë të një shkrimi në gazetën ‘Panorama’ me titull: “Ramës i pëlqejnë plehrat”, ka shkruar se opinioni publik ka mbetur i surprizuar nga një vendim i mazhorancës qeverisëse, për të miratuar ligjin për importin e plehrave.
Marku thekson se habia dhe irritimi i publikut ka të bëjë kryesisht me faktin se ishte qeveria e zotit Rama ajo që me të nisur punën shfuqizoi të njëjtin ligj të miratuar më parë edhe nga qeveria Berisha.
Më tej, ai shkruan se nëse e shikon nga këndvështrimi ambientalist, natyrisht është diçka e papranueshme, për të mos thënë një krim ndaj vendit dhe qytetarëve që jetojnë në atë vend. Nëse e shikon nga këndvështrimi i biznesit, natyrisht që është një çështje me leverdi ekonomik
“Personalisht, edhe pse e vlerësoj pa masë angazhimin e aktivistëve ambientalistë për çështje të tilla, nuk mendoj se zgjidhjet që ofrojnë ata për këto çështje janë përherë zgjidhje të mundshme për shoqërinë e sotshme. Falë industrializimit dhe konsumizmit të jashtëzakonshëm të shoqërisë moderne, krijohen aq shumë mbetje dhe plehra të të gjitha llojeve sa lipset një zgjidhje”, shkruan Marku.
Sips tij, zgjidhja është përpunimi i tyre, dhe për këtë arsye lind nevoja për impiante përpunimi e kështu krijohet një treg që funksionon sipas ligjeve të tregut.
“Është pra e domosdoshme që të gjendet një zgjidhje, një ekuilibër, mes natyrës dhe nevojës së njeriut për të shfrytëzuar të mirat e saj dhe mendoj se zgjidhja nuk gjendet as në “puritanizmin ambientalist”, as në “snobizmin industrialist” të çështjeve ambientale. Nga ky këndvështrim, edhe çështja e përpunimit apo importit të plehrave mund të përballet në mënyra të ndryshme, kështu që nuk ka pse të habitemi nëse x apo y qeveri bën një ligj të këtillë apo të atillë”, shkruan Marku për Panorama.
Ndërsa, shton, se kreyeministri Rama i trajton si plehra deputetët e tij, që vite më parë i ka mobilizuar në luftë kundër “mafies së plehrave të Berishës”, dhe që tre vite më vonë i vë të votojnë të njëjtin ligj.
“Ramës i pëlqejnë plehrat dhe ky është zhgënjimi i vërtetë për ata që vite më parë kanë besuar të kundërtën“, shkruan ai.
