Maqedonia e Veriut ka raportuar 1182 raste të reja me COVID-19 dhe 25 viktima në 24 orët e fundit.
Megjithëse këto shifra janë më të ulëta se ato që u raportuan ditën e djeshme, ato mbeten të larta. Për këtë arsye qeveria e Maqedonisë së Veriut ka vendosur të shpallë gjendjen e krizës në të gjithë vendin.
Në njoftimin e qeverisë thuhet se vendimi u mor me rekomandimin e Këshillit të Sigurisë Kombëtare që drejtohet nga presidenti Stevo Pendarovski.
Shpallja e gjendjes së krizës i jep mundësinë qeverisë të administrojë edhe spitalet private për të tajtuar pacientët me COVID-19.
Zbatimi i gjendjes së krizës do të konsistojë në ngritjen e një shtabi qendror për menaxhimin e pandemisë. Ky shtab do të menaxhojë 80 shtabe lokale në çdo komunë, për të marrë vendime lidhur me menaxhimin e situatave.
Gjendja e krizës do të zgjasë 30 ditë dhe ajo nuk nënkupton vendosjen e orëve policore apo kufizim të lëvizjes.
Që nga fillimi i pandemisë Maqedonia e Veriut ka regjistruar gjithsej 53,631 raste me Covid-19, prej të cilëve 31,659 janë shëruar kurse 1,487 persona kanë humbur betejën me koronavirusion e ri. Për momentin vendi regjistron 20,485 raste aktive./ Opinion.al
