Deputeti i BDI-së, Artan Grubi, sonte, në një lidhje direkte nga Parlamenti i Maqedonisë ka folur për emisionin “Opinion”, në lidhje me ngjarjen e rëndë të ndodhur pasditen e sotme në Maqedoni.
Grubi theksoi se deputetët e Kuvendit janë ngujuar në korridorin e katit të dytë dhe ndodhen nën mbrojtjen e Forcave Speciale të Maqedonisë.
Ai tregoi se protestuesit kanë ndërhyrë në katin e parë të Kuvendit, gjë e cila ka bërë të pamundur daljen nga mjediset e tij.
Deputeti i BDI-së, tha se masa e madhe e protestuesve ka rrethuar gjithë Parlamentin e Maqedonisë, duke e bërë të pamundur deri në këto çaste daljen e deputetëve nga aty.
Ndër të tjera, Grubi bëri me dije se shumë deputetë, mes tyre dhe shumë shqiptarë janë lënduar si pasojë e dhunës së ushtruar nga protestuesit.
