Një operacion antidrogë në Firence të Italisë mbrëmjen e së martës ka çuar në pranga dy të rinj shqiptarë të moshave 25 dhe 33 vjeç, teksa u kanë sekuestruar mbi 8 kg heroinë me vlerë rreth 400 mijë euro.
Gjithçka nisi me një postobllok policie
Siç raportojnë mediat italiane, policia kishte ngritur një postobllok synonte goditjen e tregtarëve të drogës dhe prej kohësh mbante në vëzhgim një makinë në qendër të fshatit Tavarnuzze.
Shoferi i automjetit, një shqiptar 25 vjeçar, ka bërë manovra të çuditshme para oficerëve të policisë për të shmangur kontrollin. Por përpjekja e tij rezultoi e pasuksesshme pasi u ndalua menjëherë dhe përfundoi në prangat e policisë.
Që prej fillimit, kur u pikas nga policia, i riu tregoi shenja nervozizmi, shenjë kjo e zakonshme tek shitësit e lëndëve narkotike. Kjo sjellje bëri që policia të ushtronte kontrolle të mëtejshme në makinën e tij.
Gjatë operacionit, karabinierët zbuluan se në mjetin tip “Fiat Punto”, ishin modifikuar pjesë të posaçme për transportimin e drogës.
Brenda mjetit në dy vende të ndryshme u gjetën 1.1 kg heroinë.
7.2 kg heroinë ju gjetën në banesë
Hetimet nuk u kufizuan vetëm me kërkimin e makinës, por edhe në vendbanimin e 25 vjeçarit shqiptar, në gjendet në qytetin e afërt të Greve në Chianti.
Në shtëpi, e shndërruar në një lloj laboratori për paketimin e drogave, ishte një 33 vjeçar, gjithashtu shqiptar, i cili u ndal më vonë nga policia.
Forcat e rendit zbuluan edhe 7.2 kg heroinë, materiale për presimin e drogës, peshore elektronike, përzierës, materiale për paketimin e dozave.
Lënda narkotike u konfiskua së bashku me makinën dhe apartamentin.
Sipas përlogaritjeve, nëse heroina e sekuestruar do të ishte hedhur në treg do të kishte sjellë përfitime prej 400 mijë euro për tregtarët e drogës.
Të dy shqiptarët u arrestuan dhe u transferuan në burgun Sollicciano në Firence./ B.K Opinion.al
