Ylli Manjani ka folur sot për drejtorin e përfolur për trafik droge, Klemend Balili. E kemi shkarkuar tha Manjani, edhe pse ende nuk është thirrur nga policia. Lajmi për shkarkimin u bë i ditur nga Manjani edhe pse në fakt ai është emëruar si drejtor i Transporteve në Sarandë, nga ministri Edmond Haxhinasto.
“Ky person është shkarkuar sot për t’u dhënë hapësirën e nevojshme të gjithë organeve të hetimit. Kjo është minimalja që duhet të merret ndaj një qytetari, pavarësisht se atë askush s’e ka thirrur. Të merret të hetohet si një qytetar i lirë dhe të vazhdojë jetën e vet”, tha Manjani.
Manjani tha se kemi informacion prej kohësh për trafikun dhe kemi bashkëpunuar me grekët dhe DEA-n (njësi amerikane).
“Operacioni policor nuk është i 48 orëve të fundit, por vijon që nga muaji mars. Ministri i Drejtësisë ka një raport komplementar në raport me organet e shtetit. Kemi përcjellë të gjitha letërporositë e nevojshme. Kam dijeni dhe besoj se e gjitha kjo shkon në mënyrë zyrtare në favor të një hetimi të plotë. Publikimi i këtyre gjërave nuk i ndihmon hetimet, ndaj jemi të rezervuar në informacione”, tha Manjani.
I pyetur për lidhjet e Balilit me LSI, nënkryetari i kësaj force politike, Ylli Manjani deklaroi se mbështet Policinë e Shtetit në punën e saj. Sipas tij, kush ka shkelur ligjin, të shkojë pas hekurave.
“Ka mbështetjen time, Policia e Shtetit, policia e shtetit grek, organet e hetimit, prokurori i përgjithshëm i të gjithë institucioneve. Kërkesa ime ka qenë dhe mbetet një, cilido person king, grup, i fortë, ministër, zyrtar, nëse ka shkelur ligjin do të jetë prapa hekurave”, theksoi Manjani.
