Emri i ish-ministrit të Drejtësisë, Ylli Manjani u përfol si kandidat për kryetar i bashkisë së Tiranës, nga ana e kryetares së LSI-së, Monika Kryemadhi gjatë një interviste televizive. Por vetë Manjani e ka hedhur poshtë mundësinë se është i ofruar si propozimi për të kandiduar nën siglën e koalicionit opozitar PD-LSI.
“Nuk kam marrë asnjëherë asnjë propozim zyrtar nga asnjë forum i asnjërës parti për të qenë kandidat. Unë vetë nuk e kam menduar për asnjë çast këtë gjë. Në kuptimin që nuk më ka interesuar ndonjëherë kjo gjë. Ka pasur njerëz dashamirës të mi, politikanë, gazetarë dhe të tjerë që e kanë shprehur këtë gjë si dëshirë e tyre. Në këtë grup bën pjesë edhe kryetarja e LSI Zonja Monika Kryemadhi. E përsëris ka qenë një dëshirë e tyre dhe jo një propozim zyrtar e aq më pak pranim nga ana ime. Kjo është e vërteta!”, shkruan Manjani në Facebook.
Një kandidat jashtë politikës
Ish-ministri i Drejtësisë, Manjani i mëshon idesë që kandidati i opozitës për bashkinë e Tiranës, ndryshe nga ajo çfarë pretendon kryetarja LSI-së, Monika Kryemadhi nuk duhet të ketë një staturë të fortë politike, pra duhet të jetë një person që nuk duhet të ketë si synim që ta përdorë këtë bashki si trampolinë për të marrë drejtimin e partisë politike.
“Publikisht jam shprehur disa herë se do të mbështes me shumë zell idenë e kandidatëve jo politikë për bashkinë e Tiranës. Tirana që prej vitit 2000 ka qenë peng i kryetarëve me axhendë politike. Kjo “pengmarrje” në thelb ka dëmtuar qytetin, i cili u mbush me ndërtime kuturu ose u la pa financim e pa kontroll për shkak të debatit politik. Për vite me radhë qyteti mbeti pa një plan rregullues, për shkak të këtij debati. Ndërtimet kuturu, gjej tokë e hap themele me studime pjesore u bënë nën justifikimin “qeveria s’na jep kompetenca”… nën këtë okelio qyteti mori drejtimin e zhvillimit kaotik që shohim sot”, thekson Manjani.
Sipas tij, “për fat të keq edhe Tirana aktuale është pjesë e axhendës politike personale të kryetarit aktual. Ai si paraardhësit e tij, po e përdor bashkinë jo për punët e qytetit, siç propagandon, por për të forcuar kultin e tij si person. Kult i cili sugjeron gjerësisht se Ai është “paraardhësi i Edi Ramës”.
“E përsëris: Tirana ka nevojë për kryetar Bashkie që të punojë për qytetin jo për partinë. Dikush nga krahët politikë duhet ta hedhë hapin e depolitizimit të bashkisë Tiranë. Do tē dëshiroja që të ishte opozita e sotme e para që ta bënte këtë gjë. Në këtë kontekst e kam parë dhe trajtuar edhe dëshirën dashamirëse të atyre që mendojnë se unee mund të jem një kandidat. Dua s’dua unë, pavarësisht se mbetem kritik me partitë, formalisht jam ende anëtar i forumeve dhe kam mbajtur funksione politike të larta. Pra emri im lidhet me politikë, pavarësisht se mendimet që shpreh janë krejt miat. Kritikën ndaj Erion Velisë nuk e kam si rival, por si qytetar i zhgënjyer që dikur e ka votuar me shumë qejf. Ndaj sot nuk kam se çfarë ti shtoj më shumë kësaj ideje që e kam stërthënë”, thekson Manjani.
*Deklarata e Monika Kryemadhit për kandidatët për kryetar bashkie të opozitës
*Statusi i Manjanit në facebook
