Ministri i Drejtësisë, Ulsi Manja në një konference për shtyp ka bërë të ditur se do të kallëzojë në SPAK zyrtaren e lartë të Agjencisë së Trajtimit të Pronave dhe zyrtarë të tjerë të këtij institucioni.
Manja tha se në bashkëpunim me zyrtarë të tjerë, zyrtarja e lartë është përgjegjëse për kompensim pronash në zonat më të mira bregdetare, dhe kalimin e disa prej tyre në emër të të afërmve të zyrtarëve.
“Pas një hetimi të gjatë të kësaj njësie, zyrtarja më e lartë e Agjencisë së Trajtimit të Pronave, drejtori i kompensimit financiar në këtë agjenci dhe një zyrtar tjetër, rezultojnë të implikuar në veprimtari abuzive përmes skemash abuzive, të cilat dyshohet fort se kanë prodhuar korrupsion domethënës.
Është radha e SPAK-ut të thellojë hetimet e veprimtarisë së këtyre individëve dhe të zbardh deri në fund skemat abuzive të vëna në veprim në shkelje të ligjit e në kurriz të qytetarëve.
Janë dy skema të dokumentuara, përmes të cilave zyrtarët e lartë të Agjencisë janë përfshirë në korrupsion. Ish-pronarët i kanë shitur dokumentet te sekserët, të cilët menjëherë kanë aplikuar te Trajtimi i Pronave dhe janë kompesuar 100% financiarisht, por edhe me prona në zona turistike. Më pas, edhe i kanë tjetërsuar këto prona te familjarë të Agjencisë së Trajtimit të Pronave.
Skema tjetër, në lidhje me kompensimin e ish-pronarëve, në pronën e të cilëve janë ngritur objekte që janë legalizuar. Skema e kompensimit financiar ndjek rendin kronologjik që vjen nga vendimet e Kadastrës. Por, nuk ndodh kështu. Ka ish-pronarë që presin nga 5 vjet për shuma qesharake, ndërsa nga ana tjetër ka ish-pronarë që janë kompensuar në shuma marramendëse, deri në 500 milionë lekë të vjetër, brenda 17 ditësh. I mbetet SPAK-ut të thellojë më tej hetimet”,-tha ministri i drejtësisë.
