Nga Lezha, ku po prezanton platformën për Bashkëqeverisjen, kryeministri Edi Rama tha se në mandatin e tretë qeverisës do të promovojë kalimin e shërbimeve online.
Ai theksoi se janë mbi 1200 shërbime të cilat do të marren pa pasur nevojën e prezencës fizike.
Kreu i qeverisë theksoi edhe njëherë se nga 1 janari do të mbyllen të gjitha sportelet.
“Duam të promovojmë dhe një risi tjetër të mandatit të tretë që është kalimi i të gjitha shërbimeve me dokumente në zyrat e shtetit drejt për drejt në telefonin tuaj të gjithë qytetarëve. Ne do krijojmë mundësinë që për të gjitha shërbimet që shtetit jep për të gjitha llojet e dokumenteve, që nga certifikata familjare, tek pagesa e taksave tek të gjitha ndërveprimet me institucionet e sigurimeve shoqërore e deri tek regjistrimi i fëmijëve në shkollë. Janë mbi 1200 shërbime të cilat nuk kanë nevojë për prezencë fizike pa dalë nga shtëpia fare. Me këtë mekanizëm nuk ke nevojë të shkosh gjëkundi.
Janë disa shërbime që nuk bëhen në mënyrë të digjitalizuar, që nga karta identiteti, apo martesa, duhet të jemi prezent! Shërbimet me prezencë fizike janë 5%, ndërkohë që 95% janë pa nevojën e prezencës fizike. Sistemi sot ka kapacitetin ta ndjekë kërkesën tënde, nuk varet nga një person. Sot të gjithë shtetin kur vjen puna për shërbime e ke në xhep. Do krijohen harta digjitale. Sot nuk ka nevojë për sportel as në Hipotekë. Duke filluar nga 1 janari do ti mbyllim të gjitha sportelet. Siç na erdhi pandemia që nuk na pyeti dhe të gjithë shfrytëzuan e-Albania, kështu do të bëjmë edhe me sportelet. Është fatkeqësi që ndërkohë kemi këtë mekanizëm dhe të presim. Dhe kostoja të jetë e madhe.”- tha Rama.
