Lëvizja Socialiste për Integrim deri tani ende nuk ka një qëndrim zyrtar për djegien e mandateve. Sot deputeti Edmond Haxhinasto mori pjesë në Komisionin e Ekonomisë, ndërkohë ish-ministrja e Integrimit Klajda Gjosha thotë se konsensusi i vetëm i opozitës është të djegë qeverinë e dalë nga zgjedhjet e inkriminuara.
“Konsensusi i vetëm i opozitës është të djegë qeverinë e dalë nëpërmjet zgjedhjeve të inkriminuara dhe vjedhjes së votës. Shqiptarët e meritojnë rikthimin e demokracisë së munguar”, shkruan Klajda Gjosha në Facebook.
Edhe Kejdi Mehmetaj ka qenë në të njëjtën linjë, duke shkruar: “Mandatet nuk janë të deputetëve por të qytetarëve! Ata folën qartë dhe fort ditën e shtunë. Kundër regjimit kriminal të Edi Ramës!”
Ndërkohë, deputetja tjetër e kësaj force politike, Floida Kërpaci shkruan: “Ç’vlerë ka mandati kur ai e helmon popullin e tij?!”
Tani na mbetet të presim vendimin zyrtar të LSI-së që pritet të merret pas një mbledhjeje gjatë ditës së sotme.
Në nenin 71 të Kushtetutës përcaktohet se mandati i deputetit mund të mbarojë edhe kur hiqet dorë prej tij, pa pritur mungesën për 6 muaj me radhë. Menjëherë pas këtij veprimi, deputeti, sipas Kodit Zgjedhor, duhet të deklarojë në mëyrë publike vendimin para Komisonit për Rregulloren dhe Mandatet. Nëse lista e kandidatëve partiakë shterohet, atëherë mandati i ndërprerë i kalon partisë së koalicionit me herësin më të lartë.
