Gjithçka do të marrë fund të mërkurën në orën 17:00. Partia Demokratike mbledh nesër Këshillin Kombëtar dhe do të jetë ky organ i partisë që do të japë vendimin final në lidhje me dorëzimin e mandateve. Ndërkohë pasditen e sotme në orën 18:00, mblidhet Kryesia e PD-së.
Një ditë pasi deputetët e opozitës vendosën djegien e mandateve, kreu i PD-së, Lulzim Basha ka takuar mëngjesin e sotëm Kryetarin e Këshillit Kombëtar të PD-së, Bujar Nishanin, ku është diskutuar pikërisht për këtë çështje.Në përfundim të këtij takimi, i pyetur nga gazetarët Basha tha se hapi i parë që duhet ndërmarrë është dorëheqja e Kryeministrit Rama, ndërsa theksoi se nuk ka kthim pas.
“Nuk ka kthim prapa, nuk është thjesht djegie mandatesh, nuk do ketë më parlament, nuk do ketë parlament fasadë, ata mund të mblidhen të marrin vendime dhe shqiptarët do i përgjigjen. Ne do të jemi krah qytetarëve. Nuk ka lëvizje më pro Europës se kjo që po bën PD”, tha Basha. G.F/ Opinion.al
