Lajmi i dorëzimit të mandateve nga ana e opozitës shqiptare, është pasqyruar gjerësisht në mediat italiane.
Gazeta “Il Fatto Quotidiano” shkruan se “Vendimi i 43 deputetëve në Parlamentin Shqiptar u mor me unanimitet pas propozimit të liderit Lulzim Basha, pas manifestimeve në shesh të shtunën e kaluar”.
Ndërkohë, në “Il Post” artikulli dedikuar kësaj ngjarjeje ka titullin “Në Shqipëri të gjithë deputetët e partisë së parë opozitare dorëhiqen për të protestuar kundër qeverisë”. Ky artikull i referohet fjalëve të Bashës, sipas të cilave “qeveria ka marrëveshje me grupet kriminale, korrupsioni është shfrenuar, sistemi gjyqësor është marrë peng dhe mungon Gjykata Kushtetuese.”
Nga ana tjetër, edhe “Rai” i ka dhënë hapësirë të veçantë kësaj ngjarjeje, duke thënë se deputetët e qendrës së djathtë do të dorëzojnë në grup mandatet. Në artikullin e saj, “Rai” flet edhe për kryeministrin Rama, i cili “me 78 vende në Parlament, duket se për momentin nuk shqetësohet”.
“Kaos në Shqipëri”. Kështu nis kronika e “TG24”, që duke bërë një përmbledhje të situatës në Shqipëri nga protesta e së shtunës deri në vendimin ekstrem të dorëzimit të mandateve. Duke folur edhe për qeverisjen e Edi Ramës, media italiane shkruan se “Kontestohen edhe politikat e tij ekonomike, në një vend ku varfëria është e përhapur.”/EU
