Pas stuhisë, gjithnjë vjen dielli … Këtë ligj të pashkruar të natyrës pret edhe Chapecoense, klubi brazilian që humbi 19 futbollistë në aksidentin ajror të 28 nëntorit në Kolumbi, teksa u identifikuan të vdekur edhe 52 pjesëtarë të tjerë të delegacionit. Me vrullin e rindërtimit të gjithçkaje, sot u zgjodh trajneri i ri i skuadrës, Vagner Mancini, i cili do të ketë një mision të vështirë. Ai njihet si një strateg i ekipeve të pozicionuara në mes të tabelës së renditjes, por karriera e tij ka edhe triumfe, si ai i vitit 2005, kur udhëhoqi skuadrën Paulista drejt trofeut të Kupës së Brazilit, një ngjarje që nuk mund të harrohet.
Trajneri i cili do të riformojë skuadrën e Chapecoense-s, Vagner Mancini Në të kaluarën, Mancini ka drejtuar skuadra të njohura si Gremio, Santos, Vasco da Gama, Cruzeiro dhe Botafogo. Nga sot, me punën e tij Chapecoense nis një kapitull të ri, pasi do të luajë në turneun e Kupës Libertadores për herë të parë në historinë 43-vjeçare të klubit. Deri tani, Mancini ka gati vetëm gjashtë futbollistë profesionistë, por pritet që disa klube në Brazil ta ndihmojnë duke huazuar lojtarë të tyre. Lajmi më i madh i ditëve të fundit për Chapecoense-n qe ftesa e ardhur nga Barcelona për të luajtur një ndeshje miqësore në “Camp Nou”.
