“Nuk është çështje parash”. Në këtë mënyrë Roberto Mancini provon ende të mbrohet, pasi dha dorëheqjen në mënyrë të papritur nga Kombëtarja e Italisë. Mediat raportuan se vendimi i tij i shpejt u ndikua nga negociatat për të marrë drejtimin e përfaqësueses së Arabisë Saudite.
Edhe pse trajneri i mohoi lajmet, tashmë situata po kristalizohet. Edhe pse pretendon se nuk është çështje financash, Mancini është fare pranë finalizimit të kontratës me sauditët. Zyrtarizimi i marrëveshjes dhe prezantimi i trajnerit në Riad është vetëm çështje orësh.
Ish-tekniku i Italisë do të firmosë kontratë 3-vjeçare,nga e cila pritet të përfitojë 90 milionë euro. Me llogari të thjeshta, Roberto Mancini do të paguhet 30 milionë euro në vit.
Vetëm pak muaj më parë, Arabia Saudite befasoi në Botërorin2022, duke fituar 2-1 përballë Argjentinës. Ai rezultat i dha besim drejtuesve të federatës, që të projektohen drejt Botërorit 2026 në SHBA, Meksikë dhe Kanada.
Për këtë arsye, kontrata e Mancinit do të zgjasë pikërisht deri në vitin 2026, por më parë trajneri duhet të fitojë Kupën e Azisë, trofe që nis në janar 2024 dhe që mungon prej vitit të largët 1996. Tekniku italian do të debutojë më 8 shtator në miqësoren me Kosta Rikën, ndërsa katër ditë më pas e pret testi me Korenë e Jugut.
