Kampionati anglez mund të quhet i mbyllur. Të paktën për Tottenham. Të besuarit e Pep Guardiola-s nuk e kanë pasur të vështirë të kalonin pengesën, të vështirë në letër, Tottenham teksa golat e Gundogan, Sterling dhe De Bruyne vulosën fitoren e 16-të radhazi të Qytetarëve të cilët vazhdojnë të marshojnë drejt titullit me një hap të pandalshëm.
Skuadra vendase nuk deshi shumë për të zhbllokuar rezultatin. Pas krosit të Sane nga goditja e këndit është Gundogan ai që gjendet i vetëm në zemër të zonës kundërshtare duke shtyrë topin në rrjetë. Tottenham nuk reagon dhe ekipi i vetëm në fushë mbetet City, që humb disa raste të arta për të dyfishuar. Harry Kane dhe Dele Alli duhet të kishin dalë nga loja me karton të kuq pas dy ndërhyrjeve horror por arbitri i jep vetëm karton të verdhë.
Pak pasi De Bruyne kishte pësuar një goditje të rëndë në kavilje nga Alli, ai shënon golin e dytë me një gjuajtje të fuqishme nga cepi i zonës. Pak pas tij është edhe Sterling që shënon dy gola në portën e Lloris. Një humbje e turpshme për Tottenham, dhe goli në fund i Eriksen nuk mjaftonte as për t’u quajtur goli nderit.
