Ministrja e Shëndetësisë, Ogerta Manastirliu, është shprehur se në vendin tonë nuk ka mungesë kitesh për testime, por ato bëhen sipas udhëzimeve të Organizatës Botërore të Shëndetësisë (OBSH).
“Nuk ka mungesë kitesh, po marrim furnizime të vazhdueshme me kite dhe tampona, çdo hap e hedhim në zbatim të rekomandimeve të OBSH, edhe në lidhje me testimet. Mënyra se si dhe sa realizohen testimet përcaktohet nga komiteti teknik i ekspertëve, që të identifikohen sa më shpejt personat e prekur, që të ndalohet përhapja. Këtë javë jemi furnizuar me kite dhe do të vijojë ky furnizim. Nuk e vendos ministri i Shëndetësisë se kush do të testohet, por ekspertët në terren”, deklaroi Manastirliu.
Ministrja bëri një thirrje tjetër për qytetarët që të mos dalin nga banesat: “Mjekët po bëjnë punë fantastike, por ajo që dua të them është që t’i krijojmë atyre mundësinë që të ofrojnë shërbimin e tyre më të mirë, prandaj duhet të izolohemi. Nuk është sakrificë e madhe të mos dalësh nga shtëpia apo të mos takosh shoqërinë. Duhet të kemi kujdes, që të lehtësojmë sistemin shëndetësor dhe të kenë mundësinë të trajtojnë të infektuarit. Po punojmë në vazhdimësi për të rritur stokun e pajisjeve të mbrojtjes, por edhe sistemet më të zhvilluara shëndetësore po shkojnë në kolaps nga fluksi. Duhet ta kuptojmë këtë dhe t’i lëmë kohë sistemit tonë që të mundet të trajtojë pacientët siç duhet”.
Kur u pyet për numrin e shtetërve që janë në dispozicion për të përballuar emergjencën, Manastirliu tha: “Në bazë të fluksit dhe dinamikës, po përgatitemi”.
Gjithashtu, ministrja e Shëndetësisë pohoi se ashtu si në të gjithë botën, edhe në vendin tonë përqindja më e lartë e të prekurve janë meshkuj.
Në lidhje me faktin nëse janë gati spitalet private për të pranuar pacientë me Covid-19, Manastirliu tha: “Kur spitalet jopublike do të përfshihen në regjimin e pacientëve me Covid-19, do i sigurojmë të gjitha masat e mbrojtjes personale. E kemi shumë të çmuar personelin mjekësor. Ne po përpiqemi maksimalisht, prandaj i lutemi qytetarëve që të zbatojnë rregullat dhe të mos kemi dyndjen që kanë sot vendet e tjera”.
“Kemi marrë masa drastike që kur doli rasti i parë, kur Italia kishte bllokuar vetëm Veriun. Ne bëmë menjëherë atë që nuk kishin bërë të tjerët. Çdo gjë është bërë siç duhet në raport me eksperiencat e vendeve të tjera”, shtoi ministrja e Shëndetësisë, Ogerta Manastirliu./ A2
