Dy të rinj në Mamurras, Paulor Noka dhe Romario Gjoni janë shpallur në kërkim nga policia pasi kanë kanosur me armë zjarri një shtetas.
Bëhet me dije se shkak i ngjarjes është bërë kërkesa që Shtjefën Ndreka u ka bërë të rinjve për të mos xhiruar gomat para banesës së tij.
Policia ka bërë me dije se ngjarja ndodhi në lagjen “Demokracia” në Mamurras, por raportohet se nga të shtënat nuk ka patur të lënduar.
“Me marrjen e njoftimit, shërbimet e Policisë Kurbin kanë mbërritur menjëherë në vendngjarje. Në mbështetje të tyre kanë shkuar edhe Forcat Operacionale të DVP Lezhë dhe FNSH Shkodër.
Janë ngritur pika kontrolli, si dhe vijon kontrolli i zonës, me qëllim lokalizimin dhe kapjen e autorëve të dyshuar. Grupi hetimor, nën drejtimin e Prokurorisë, vijon veprimet hetimore në vendin e ngjarjes, me qëllim zbardhjen e plotë dhe dokumentimin ligjor të ngjarjes”, njoftoi policia./Opinion.al
