Pasi e deklaroi të fituar betejën me koronavirusin e ri, me vetëm 324 raste të konfirmuara dhe 9 viktima, Mali i Zi është gati të hapë turizmin.
Kryeministri i vendit, Dusko Markovic, njoftoi se në qershor do të rihapte kufijtë për ato shtete që raportojnë jo më shumë se 25 raste infektimesh për 100 mijë persona. Mes tyre janë Shqipëria, Kroacia, Sllovenia, Greqia dhe Gjermania.
“68 ditë pas rastit të parë më koronavirus në Malin e Zi nuk ka më të infektuar. Ne e fituam betejën kundër këtij virusi të pamëshirshëm dhe Mali i Zi bëhet shteti i parë në Europë i çliruar prej tij. Suksesi duhet ndarë mes shtetit, institucioneve të tij dhe çdo individi në vend”, deklaroi kryeministri malazez, Dusko Markovic.
Mali i Zi mbylli kufijtë, aeroporte e shkolla në muajin mars, por mes të dhënave pozitive lidhur me krizën ka nisur zbutjen e masave që prej 30 marsit. Megjithatë, duket se tani vendi është gati të presë vizitorë sërish pasi pacienti i fundit me COVID-19, u shërua në fundjavë./Opinion.al
