“Aksioni për lirimin e hapësirave publike ka përfshirë dhe policinë rrugore Tiranë, e cila prej ditësh po grumbullon automjetet që prej kohësh janë të palëvizshme në rrugët e kryeqytetit.
Por edhe pse një fushatë e re, kjo ka zgjuar një problem të hershëm dhe mesa duket çlirimi i një hapësire do të prodhojë bllokimin e një hapësire tjetër, pikërisht këtë përballë komisariatit të policisë rrugore Tiranë”, raporton gazetari Merin Maçi.
janë këto automjete që janë bllokuar nga rrugorët e Tiranës, e që prej kohësh janë të palëvizshme.
Ky varg automjetesh që prej vitesh gjenden të parkuara në dy krahët e rrugës pranë komisariatit rrugor, vjen për shkak të mungesës së një pike bllokimi.
Aktualisht policia rrugore Tiranë ka të shfrytëzueshme për magazinim të automjeteve të bllokuara, hapësirën në oborrin e komisariatit, si dhe një sipërfaqe të vënë në dispozicion pranë drejtorisë së rezervave të shtetit.
Por këto hapësira janë të pamjaftueshme për të mbajtur të gjitha automjetet e bllokuara, nisur nga kjo policia rrugore është e detyruar t’i parkojë në rrugë.
Pak kohë më parë, Bashkia Tiranë i vuri në dispozicion një sipërfaqe toke që do të shërbente si pikë bllokimi për automjetet, por ajo hapësirë ende nuk është vënë në punë.
Derisa ky ngërç të zgjidhet, policia do vijojë të zërë hapësirën publike me automjetet që bllokon.
Tv Klan
