Prokuroria e Tiranës dhe Shërbimi i Çështjeve të Brendshme dhe Ankesave kanë zhvilluar sot një konferencë të përbashkët për shtyp në lidhje me arrestimin e katër punonjësve të policisë kufitare në pikën e Qafë Botës. Arrestimi i tyre u bë ditën e djeshme në sajë të një operacioni që kishte në fokus goditjen e një rasti të kontrabandës së makinave nga Arben Grabovari që është arrestuar në muajin prill.
Prokurorja Mirela Cano shpjegoi detajet e këtij operacioni. Grabovari u arrestua në Prill të 2019 duke hyrë në Qafë Botë me një pasaportë greke. Sipas hetimeve të prokurorisë ai gjatë periudhës 2017-2019 ka hyrë 53 herë në Shqipëri me makina të ndryshme me leje të përkohshme. Nga këto mjete ai ka zhdoganuar vetëm 5 prej tyre, duke ju shmangur kështu detyrimeve me vlerë 4.5 milion lekë.
Sa i përket policëve të arrestuar, ata nuk kanë pasqyruar numrin e shasisë në 19 raste. Për momentin po hetohen për shpërdorim detyrë 10 punonjës policie, 4 janë në burg nga Qafë Bota, ndërsa 6 të tjerë janë pezulluar nga Kapshtica dhe Tre Urat. Ka edhe punonjës të tjerë të përfshirë që po hetohen sipas prokurores.
“Dua të sqaroj që prokuroria e Tiranës duke marrë shkas nga autoritetet franceze dhe doganore shqiptare regjistroi procedimin për kontrabandë në ngarkim të Arben Grabovarit. Në Prill të 2019 ky person duke hyrë në Qafë Botë ka përdor një pasaportë si shtetas grek, po hetohet në arrest me burg. Gjatë hetimit rezultoi se nga 2017-2019 në prill ka hyrë 53 herë me mjete tokësore me makina të ndryshme me lejim të përkohshëm me shmangie të detyrimeve 4.5 mln lekë. Nga mjetet ka zhdoganuar vetëm 5 prej tyre. Makinat nuk janë zhdoganuar dhe janë hedhur në qarkullim duke krijuar mundësi për ti përdorur edhe për qëllime të tjera.
Në 19 raste policët kufitarë nuk kanë pasqyruar numrin e shasisë duke i bërë të paidentifkueshme duke u shënuar vetëm autoveturë. Po hetohet për identifikimin pasi makinat mund të jenë përdorur në ngjarje kriminale. Arben Grabovari ka kryer zhdoganimet në pika të ndryshme, Kapshticë, Qafë Botë dhe Tre Urat. Policët kufitarë e kanë lejuar të kalojë pa kryer procedurën përkatëse. Po hetohet për shpërdorim detyrë 10 punonjës policie, 4 janë në burg nga Qafë Bota, ndërsa 6 të tjerë janë pezulluar nga Kapshtica dhe Tre Urat. Ka edhe punonjës të tjerë të përfshirë që po hetohen” tha prokurorja Cano. /Opnion.al
