Daja i Zamir Latifit, i cili mbeti i vrarë dy vjet më parë në një masakër në Lushnjë, është ekzekutuar mëngjesin kësaj të marte në një lokal ku po pinte kafe vetëm. Ai është Besmir Hida, 40 vjeç, banor në lagjen “Skënder Libohova” në Lushnjë. Sipas policisë dy persona ende të paidentifikuar, kanë qëlluar me armë zjarri automatike në drejtim të Besmir Hidës, i cili ndërroi jetë në vend.
Autorët janë larguar nga vendngjarja me një automjet, që dy orë më vonë u gjet e djegur në një fushë në lagjen “Saravë” në periferi të Lushnjës. Brenda në makinë u gjenden edhe armët e krimit, por gjurmë të autoreve nuk ka. Makina tip “Fiat” e përdorur nga autorët është denoncuar e grabitur disa ditë më parë në zonën e Ish-Doganës, në Tiranë.
Policia për këtë ngjarje nuk pati asnjë deklaratë, por sipas mediave, grabitësit filmuan një çift që po bënte dashuri në makinë, i bënë shantazh ame videon që kishin, i goditen dhe më pas i morën makinën.
Besmir Hida është daja i Zamir Latifit, të riut që mbeti i vrarë në një atentat në mes të Lushnjës në tetor të vitit 2017. Në këtë masakër mbeti i vrarë dhe shoku i tij Jurgen Hoxha. Ngjarja ndodhi në një ambient në lagjen “Loni Dhamo”, në vendin e quajtur Ura e Përroit.
Latifi dhe Hoxha ishin në shoqërinë e shokëve të tyre Marius Xhepexhiu, i cili u plagos, dhe Saimir Xhelilit. Ata u qëlluan me breshëri nga dy persona që u identifikuan nga policia. Në trupin e Latifit u gjetën 35 plumba, kurse në trupin e Hoxhës, 7 plumba. Ekzekutimi i Besmir Hides mëngjesin e së martës dyshohet se ka lidhje me zinxhirin e hakmarrjes në Lushnjë./ Opinion.al
