Makina tip “Toyota” që u përdor nga autorët për vrasjen e Erigers Mihasi dhe Armando Dumani mbrëmjen e djeshme në zonën e Astirit në Tiranë, është vjedhur në Greqi. Sipas “News24”, targat e saj u vodhën në muajin korrik në Tiranë.
Mihasi dhe Armando Dumani u qëlluan me breshëri plumbash brenda “Audit” luksoz, duke humbur jetën në vend. Autorët pasi qëlluan ndaj tyre, janë larguar me një automjet nga Astiri duke udhëtuar për në Thumanë ku dogjën makinën, brenda së cilës u gjetën dy kallashnikov.
Dyshohet se në vrasje është përdorur dhe një mjet tjetër që ka larguar autorët nga Thumana. Policia ka shoqëruar disa persona, kryesisht lidhje të dy viktimave, por edhe persona që mund të kenë dijeni për krimin. Ndërkohë që dyshohet se ka pasur edhe persona të tjerë të përfshirë në rolin e vëzhguesve.
Aktualisht grupi hetimor nën drejtimin e Prokurorisë po punon për dokumentimin e ngjarjes si dhe grumbullimin e provave që çojnë në identifikimin e autorëve të ngjarjes.
Erigers Mihasi dhe Armando Dumani ishin persona me precedent penal. Mihasi është i dyshuar për disa vepra kriminale në vendin tonë, ndërsa kohët e fundit prokuroria, edhe pse nuk kishte akuza zyrtare, po e mbante në përgjim për një vrasje të ndodhur pak javë më parë në Laç. Dumani ka qenë pjesë e një grupi grabitësish bankash./Opinion.al
