Seanca e jashtëzakonshme e kuvendit që u mbajt këtë të shtunë për votimin e votingut ktheu edhe një herë në karriget e parlamentit deputetët aktualë të tij.
Pas seancës, Majlinda Bregu një prej emrave që nuk u fut në listat e Lulzim Bashës për zgjedhjet e 25 Qershorit ka shprehur reagimin e saj lidhur me këtë seancë, ndërsa ka përcjellë edhe një mesazh për kreun demokrat.
“Më vjen mirë që sot mori fund zvarritja shumë mujore e votimit të vettingut, më vjen mirë nga ana tjetër që sot mori fund dhe aventura politike e kujt betohej muaj e muaj me rradhë se vettingu si një projekt mafioz i ndërkombëtarëve nuk do të votohej pasi ai i jepte drejtësinë Edi Ramës.
Sigurisht që do të kisha dashur që të kishte pasur kandidatura më të mira të cilët kam përshtypjen që një pjesë e tyre janë larguar edhe për faktin që dëgjonin atë që thashë më parë, që vettingu nuk do të votohej asnjëherë.
Jam krenare pasi që nga dita e parë kur reforma në drejtësi nisi kam mbështetur, kam punuar dhe sigurisht që kam përkrahur këtë reformë që është e rëndësishme për Shqipërinë dhe shqiptarët. Më lejoni me këtë rast që të falenderoj të gjithë miqtë dhe partnerët tanë ndërkombëtarë ndaj të cilëve nuk ngeli baltë, baltosje, ofendime, fjalë në anglisht dhe epitete në shqip pa u thënë por që ndihmuan të gjithë për të arritur këtu ku jemi sot.
Shpresoj dhe uroj shumë që të vërtetat që janë fshehur për një kohë të gjatë dhe ato të vërteta prej të cilave po rrezikohej dhe vettingu dhe reforma në drejtësi do të jenë shumë shpejt të qarta për të gjithë qytetarët.
Nuk mund të them që më vjen mirë që nuk do të jem në legjislaturën e ardhshme por jam e bindur që beteja sapo ka filuar.”-u shpreh Bregu.
