Deputetja e PD-së, Majlinda Bregu e ftuar në studion e ‘Top Story’ ka theksuar se humbja në Dibër nuk është një tragjedi, tragjedi është mosaftësia për të hedh sytë nga vetvetja.
Bregu bëri me dije se në kohën kur PD drejtohej nga Sali Berisha ne nuk i merrnim vesh emrat e kandidaturave të kësaj partie nga ekrani i televizorit.
“Asnjëherë nuk ka ndodhur që Sali Berisha të mos diskutonte me strukturat e partisë se kë kandidat do të hidhte si emër të mundshëm për të qenë një kandidat i denjë. Ndërsa, sot, unë e mësova emrin nga televizori.”, tha ajo.
Deputetja Bregu nënvizoi se në PD ka ardhur koha që të hedhim sytë nga gabimet tona, pasi një pamundësi e tillë, do krijojë mundësinë në të ardhmen që ne të shtojmë gabimet tona.
Ajo është ndalur edhe tek alternativa që duhet të japë PD në lidhje me elektoratin e saj.
Bregu theksoi se ne duhet të mbështetemi tek parimet, tek kontrata me qytetarët dhe jo tek koalicionet që s’kanë asgjë në thelbin e tyre, siç ishin edhe zërat me partinë LSI.
