Pas shqetësimit të LSI-së dhe letrës së Petrit Vasilit mbi rolin e bordit të ONM-së që do të mbikqyrë procesin e Vettingut, reagoi deputeti socialist Pandeli Majko. Ai i rikujtoi aleatit të tij që drejton Ministrinë e Drejtësisë, se janë të huajt ata që do mbikqyrin shqiptarët dhe jo e kundërta.
Shqetësimit të Petrit Vasilit, mbi rolin e bordit të ONM-së në procesin e Vettingut, të zyrtarizuar nga ministri i Drejtësisë përmes një letre dërguar 3 institucioneve kryesore në vend, si dhe ambasadorit amerikan Lu e asaj të BE-së Vlahutin, iu përgjigj Pandeli Majko. Deputeti socialist i rikujtoi numrit dy të LSI-së se kush është vëzhguesi në këtë proces.
Në letrën e tij, Vasili vë në dukje se Kushtetuta dhe ligji kërkojnë që ONM të përbëhet nga ekspertë, ndërsa ministri i Drejtësisë vëren se është i paqartë roli i bordit menaxhues të këtij organizmi, ndërkohë që përfshirja brenda tij e ambasadorëve Lu dhe Vlahutin nuk gjëjnë mbështetje as në Kushtetutë e as në ligj.
Si anëtar i Komisionit të Reformës në Drejtësi, ku ka qenë pjesë edhe Vasili, Pandeli Majko nënvizoi se synimi i partnerëve ndërkombëtarë nuk është të krijojnë probleme politike.
Letra ministrit Vasili mban datën 13 shkurt. Një ditë më pas, Donald Lu qëndroi për dy orë me Ilir Metën në zyrën e këtij të fundit. Në përfundim të takimit, deklarata e kreut të Kuvendit, shumë e ngjashme në tonet zbutëse me atë të Ambasadës Amerikane, tregoi se paqja ishte arritur mes LSI-së dhe selisë diplomatike amerikane.
