Presidenti francez, Emmanuel Macron ka deklaruar se është jetike që Rusia të mos poshtërohet në mënyrë që kur të ndalen luftimet në Ukrainë të mund të gjendet një zgjidhje diplomatike.
Ai ka shtuar se besonte që Parisi do të luante një rol ndërmjetësues për t’i dhënë fund konfliktit.
“Ne nuk duhet ta poshtërojmë Rusinë, në mënyrë që ditën kur luftimet të ndalojnë, ne të mund të ndërtojmë një platformë daljeje me mjete diplomatike.Unë jam i bindur se roli i Francës është të jetë një fuqi ndërmjetëse”, tha ai.
Macron ka zhvilluar biseda telefonike rregullisht me Putinin që nga pushtimi, si pjesë e përpjekjeve për të arritur një armëpushim dhe për të filluar negociata të besueshme midis Kievit dhe Moskës.
“Unë mendoj dhe i thashë, se ai po bën një gabim historik dhe themelor për popullin e tij, për veten dhe për historinë”, tha Macron.
Franca e ka mbështetur Ukrainën ushtarakisht dhe financiarisht, por deri më tani Macron nuk ka qenë në Kiev për të ofruar mbështetje simbolike politike si liderët e tjerë të BE-së.
Kujtojmë se Macron ka folur me presidentin rus Vladimir Putin që nga fillimi i pushtimit të Ukrainës nga Moska në shkurt të këtij viti. Por qëndrimi i tij është kritikuar vazhdimisht nga disa partnerë lindorë dhe baltikë në Evropë.
