Presidenti francez, Emmanuel Macron ngriti dyshime në lidhje me perspektivën e një zgjidhje mes izraelitëve dhe palestinezëve.
Komentet e Macron erdhën pasi u pyet lidhur me planin e paqes për Lindjen e Mesme, të cilin këtë javë e prezantoi presidenti i Shteteve të Bashkuara, Donald Trump.
“Unë besoj në dy sovranitete”,- tha Macron kur u pyet nëse ai besonte në zgjidhjen me dy shtete.
Megjithatë ai nuk e sqaroi më shumë qëndrimin e tij.
Macron, gjithashtu tha që ai nuk do të paraqiste ndonjë plan të tij, por sugjeroi që plani i presidentit amerikan, mund të hasë në vështirësi për tu zbatuar në terren.
“Duhet të jeni dy për të bërë paqen. Nuk mund ta arrini atë (paqen) vetëm me njërën anë”,- tha ai.
Presidenti i Shteteve të Bashkuara, Donald Trump, bëri thirrje për një zgjidhje mes dy shteteve të konfliktit midis Izraelit dhe palestinezëve, gjatë prezantimit të planit të tij për Lindjen e Mesme.
Ai u shpreh se plani përfshin që Jerusalemi të mbetet kryeqytet “i pandarë” i Izraelit.
Presidenti amerikan shtoi se plani prej 80 faqesh është “më i detajuari” ndonjëherë, premton se shteti i ardhshëm palestinez do të jetë “i lidhur” me Jerusalemin Lindor.
Ai tha se marrëveshja do të “dyfishonte” territorin nën kontrollin e palestinezëve. Palestinezët duan shtet të pavarur në Bregun Perëndimor dhe Gaza, me kryeqytet Jerusalemin Lindor.
Statusi përfundimtar i Jerusalemit ka qenë gjithmonë një nga pyetjet më të mëdha dhe më të ndjeshme në konfliktin izraelito-palestinez. Plani u mirëprit nga Izraeli, por u prit me dyshim nga Kombet e Bashkuara dhe Bashkimin Evropian. Iniciativa u prit me zemërim nga palestinezët dhe u hodh poshtë nga disa vende myslimane.
