Ma kanë bërë jetën ferr/ Sarkozy mohon të gjitha akuzat për financime nga Gadafi

Ish-presidenti francez, Nikolas Sarkozi është zyrtarisht nën hetim për përfitime të financimeve të paligjshme nga ish-udhëheqësi libian Muamar Gedafi. Por të mërkurën, Sarkozi mohoi akuzat përpara hetuesve parizienë duke thënë se ato ia kishin bërë jetën ferr që prej 2011-ës. E përditshmja franceze Le Figaro ka zbardhur dëshminë e tij, gjatë marrjes 2 ditore në pyetje.
Sarkozi akuzohet se ka përfituar deri 50 milionë euro nga qeveria libiane në formë financimesh për fushatën elektorale të vitit 2007, çka ndalohet nga ligji zgjedhor francez. Por ish-presidenti tha para hetuesve se ishte akuzuar pa asnjë provë fizike. Sarkozi thotë se nuk e ka takuar kurrë personalisht biznesmenin franko-libanez Ziad Takieddine.
Ishte Takieddine që e bëri publike aferën në një intervistë në vitin 2012 dhe konsiderohet si ndërmjetësuesi i Sarkozisë në çështjet financiare të kësaj afere.
Mediat franceze shkruajnë se edhe djali i Gadafit, Saif al-Islam, i cili në Mars të 2011-ës kërkoi që Sarkozi të kthejë paratë e fushatës që i mori nga Libia, është i gatshëm të dëshmojë ndaj ish-presidentit francez.
Tv Klan