Ministrja e Mjedisit dhe Turizimit, Mirela Kumbaro, ka thënë se këtë vit do të vihet në zbatim një projekt për pastrimin e lumit Vjosë.
Në një konferencë për mediat, teksa bëri bilancin e vitit 2022, Kumbaro duke u ndalur tek lumi Vjosë tha se qeveria ka një plan të madh i cili është përgatitur gjatë vitit të kaluar.
Sipas saj të 7 bashkitë që derdhen në lumin Vjosë do pajisen me impiante të trajtimit të ujërave të ndotura.
“Ne sapo kemi kryer, rikontruktimin e plotë të ministrisë së mjedisit, që ka të bëjë me ekonominë rrethore. Ajo që është interesante është edhe edukimi mjedisor. Në vitin 2023 fillojmë me dy investime të programit IPA. Se ne flasim për pastërti, po se dimë ku shkojnë mbetjet. Qarku Kukës dhe Qarku i Gjirokastrës do të ketë investime. Për lumin e Vjosës kemi një plan shumë të madh që e kemi përgatitur gjatë vitit 2022. Pajisja e të gjitha bashkive që derdhen në lumin e Vjosës me impante të trajtimit të ujërave të ndotura, është revolucion sepse janë 7 bashki që do pajisen. S’flasim dot për Vjosën si mbretëreshën e lumenjve të Evropës ndërkohë që sot derdhen 7 bashki në të si mungesë e këtij investimi. Ky investim shkon në 80 milionë dollarë.”- tha Kumbaro.
