Kryetari i Partisë Demokratike, Lulzim Basha i ndodhur ditën e sotme në një takim e Vorës, është shprehur se kryeministri Edi Rama, më 30 qershor do që të asgjësojë demokracinë.
Kryedemokrati, theksoi dhe një herë se zgjedhje të lira dhe të ndershme do të ketë vetëm me qeveri tranzitore.
Po ashtu, kreu i selisë blu, tha se hapja e dialogut do të bëhet pas largimit të Ramës dhe se ky është një kusht i panegociueshëm.
Ndërkohë, ai u bëri thirrje qytetarëve që më 25 maj të protestojnë në Tiranë kundër qeverisë.
“Edi Rama, për hir të pushtetit të tij po kërkon të asgjësojë demokracinë me atë që ka planifikuar më 30 qershor. Ne jemi këtu të vendosur dhe me një mesazh: nuk do të lejojmë më zgjedhje me krimin, nuk do të ketë më zgjedhje me hajdutët, vetëm zgjedhje të lira e të ndershme, pa Edi Ramën kryeministër, me qeveri tranzitore, e cila do të garantojë që në zgjedhjet parlamentare të parakohshme dhe në zgjedhjet vendore, deputetët që do të dalin nga këto zgjedhje, kryebashkiakët që do të dalin nga këto zgjedhje tëmos jenë peng i trafikantëve, të mos jenë peng i oligarkëve, i kriminelëve,por të jenë peng i qytetarëve të Vorës, i qytetarëve të të gjithë Shqipërisë. Kjo është beteja jonë dhe në këtë betejë shqiptarët janë bashkuar si kurrë më parë. Na duhet dhe do të kemi një dialog kombëtar me gjithë shqiptarët, për të vendosur sëbashku, jo thjeshtë largimin e Edi Ramës, sepse largimi i Edi Ramës është parakusht i panegociushëm për hapjen e dialogut politik. Por përmes një dialogu gjithëpërfshirës kombëtar, që ju të keni mundësi përmes votës tuaj të vendosni për një sistem elektoral që ju përfaqëson ju”,-tha Basha./ Opinion.al E.Xh.
