Që pas zgjedhjeve reagimet e Lulzim Bashës kanë qënë thuajse inekzistente, por ditën e sotme ai ka vendosur të publikojë një denoncim në profilin e tij në “Facebook”. Basha nëpërmjet këtij postimi akuzon kryebashkiakun Erion Veliaj për shkatërrim të një prej parqeve që vetë Basha ka ndërtuar në kohën kur ishte në krye të Bashkisë. Sipas Bashës, Veliaj ka lejuar betonizimin e këtij parku në favor të Besnik Sulaj, që e akuzon si klient të Ramës.
Statusi i Bashës:
Lulishtja pranë parkut të autobuzave ishte një nga investimet e mia si kryebashkiak në shërbim të qytetarëve të një prej zonave më të populluara të Tiranës. Erjon Veliaj, vegël e bindur në duart e oligarkisë që sundon vendin, e shkatërroi këto ditë lulishten dhe lejoi betonizimin e saj në favor të Besnik Sulajt, klientit të rëndësishëm të Edi Ramës.
Qytetarëve të revoltuar ata iu përgjigjën dje me dhunën e policisë. Edhe më i rëndë qe dhunimi i të drejtave të qytetarëve nga mediat kryesore të vendit të kontrolluara nga oligarkia, të cilat e fshehën protestën dhe dhunën e policisë.
Ndërkohë, Shqipëria po përjeton këto ditë mungesë dritash dhe uji sepse paratë publike u përdorën për të manipuluar votën dhe jo për të blerë energji për njerëzit.
Pushteti oligarkik herët a vonë degjeneron në pushtet të dhunës dhe të errësirës. Përballja me të është sot sfida kryesore e opozitës dhe e të gjithë njerëzve të ndershëm për të ndalur rrënimin e qyteteve, të ekonomisë dhe të ardhmes tonë.
