Lulzim Basha dhe Monika Kryemadhi kanë zhvilluar mbrëmjen e djeshme një telefonatë me Zv/Ndihmës Sekretarin e Shtetit për Evropën, Matthew Palmer. VOA, që citon një zëdhënës nga Departament Amerikan i Shtetit, shkruan se Palmer u bëri thirrje të dy udhëheqësve të opozitës të qëndrojnë të angazhuar në mënyrë konstruktive në proceset demokratike, duke theksuar rolin jetik, që partitë e opozitës duhet të luajnë në një shoqëri demokratike.
“Diplomati i lartë amerikan, “i këshilloi” dy kryetarët e partive kundër dorëheqjeve të koordinuara dhe në masë të deputetëve të opozitës nga parlamenti, pasi kjo do të dëmtonte përpjekjet për reforma dhe do të dëmtonte një institucion të rëndësishëm të demokracisë. Palmer, ndërsa theksoi mbështetjen e Shteteve të Bashkuara për të drejtën e qytetarëve për të protestuar në paqe, u bëri thirrje si zotit Basha edhe zonjës Kryemadhi të hedhin poshtë dhe të dënojnë publikisht gjithë dhunën”, raporton VOA.
Ndërkohë pa incidente kaloi protesta e opozitës këtë të enjte që nisi nga sheshi para Parlamentit, për të përfunduar pas tri orësh në selinë e Partisë Demokratike. Deputetët që firmosën lënien e mandatit iu drejtuan mbështetësve si qytetarë të lirë për të vijuar bashkarisht betejën kundër qeverisë. Më pas Basha u kërkoi protestuesve ta ndiqnin në rrugën drejt Kryesisë së Kuvendit ku opozita dorëzoi mandatet. /G.F Opinion.al
