Kryeministri i vendit Edi Rama, nga Lezha ka prezantuar ditën e sotme kandidatët për deputet, teksa gjatë fjalës së tij nuk e ka kursyer sarkazmën dhe ironinë për kundërshtarin.
Rama është shprehur se Lulzim Basha, është një dhëndër imagjinar, dhe e krahason atë me Gjinon, ndërsa shton se shkesi janë Sali Berisha, Ilir Meta dhe Monika Kryemadhi.
Ndër të tjera ai është shprehur se nusja që po kërkohet të merret është Shqipëria.
“Thuaj Sali, Monika dhe Ilir dhe i ke thënë të tëra thotë kënga popullore. Por nuk janë tre, sepse vjen Nard Ndoka, Idrizi, Mediu, me këta do të bëni Shqipërinë e fëmijëve tanë. Por ku thonë që na votoni ne që të rrinë shqiptarët. Është e qartë që Luli është dhëndri që ka nisur se do bëhet i dasmë, me shpresën që ta hajë kush ta hajë. Nusja që kërkohet është Shqipëria, nuk kërkohet për Lulin sepse është si Gjinua, por kërkohet për shkesët, për Ilirin, Saliun dhe Monikën.
Ai është për të krijuar idenë që një dasmën do të ndodhë, djali është i mirë, por gjumi i tepërt i ka dëmtuar zonën që njeriu mendon, e krijon vatra infeksioni, por vetë rri lart në makinë dhe thotë dua nuse, e dasmorët poshtë bëhen përshesh. Këta po vazhduan kështu, larg qoftë, s’ia uroj askujt, por mitingun e mbylljes do e bëjnë tek Shefqet Ndroqi. Këta aq kanë, dy gishta dhe Rama ik. Ndërsa ne jemi për të përzënë COVID-in”, tha Rama gjatë fjalës së tij./Opinion.al
