Udhëheqësi i Bjellorusisë, Aleksandër Lukashenko, duket se ka lënë të kuptohet për daljen e tij të mundshme në pension, pasi shënoi tre dekada në pushtet muajin e kaluar.
Lukashenko, 69 vjeç, një aleat i ngushtë i presidentit rus Vladimir Putin bëri disa komente më 10 gusht, duke u thënë bjellorusëve në një tubim publik se ata “duhet të mësohen me idenë se do të ketë një president tjetër”.
Ai i bëri komentet në përgjigje të një pyetjeje nëse ka ndërmend të kandidojë në zgjedhjet e ardhshme presidenciale të vendit të vitit 2025.
Lukashenko u zgjodh president në vitin 1994 në zgjedhjet e para të mbajtura në Bjellorusinë e pavarur. Ai shënoi 30 vjet në pushtet më 20 korrik. Zgjedhjet e ardhshme presidenciale në Bjellorusi do të mbahen jo më vonë se 20 korrik 2025, ndërsa synimin për të kandiduar ai e shpalli në shkurt.
“Jo, nuk them që do t’ju braktis nesër, pasnesër e kështu me radhë. Por gjithçka mund të ndodhë në jetë. Duhet të mësoheni me faktin se unë nuk jam i përjetshëm, ashtu si të gjithë ju”, citoi Lukashenko.
Ai theksoi se përpara se të largohet nga detyra, duhet “të largohet nga një vend paqësor dhe i qetë”.
“Kur të largohem do të jetoj pranë jush në një fshat diku dhe kur të kthehem do të kujtoheni dhe do të jeni mirënjohës që gjërat nuk janë përkeqësuar”, tha ai.
Të hënën, lideri bjellorus gjithashtu lëvizi për të ndryshuar kodin penal të vendit të tij – duke vendosur deri në tetë vjet burg për kërcënime ndaj një ish-presidenti dhe anëtarëve të familjes së tij, raportuan mediat ruse.
