Ambasadori Luigi Soreca është rikthyer sërish në Tiranë dhe këtë herë ai do të jetë i komanduari i BE deri në momentin që të mbërrij ambasadori i ri.
Ai është takuar sot me delegacionin e Bashkimit Europian dhe ka nisur menjëherë nga puna.
Në një postim në rrjetet sociale, Soreca e ka cilësuar si një privilegj rikthimin në Tiranë, nisur nga fakti që për Shqipërinë është një moment mjaft i rëndësishëm në rrugën e saj drejt familjes europiane.
“Është një nder dhe një privilegj të jem përsëri në Tiranë në këtë moment veçanërisht të rëndësishëm për zgjerimin e BE-së dhe për procesin e integrimit të Shqipërisë në BE, dhe në të njëjtën kohë me Samitin e ardhshëm të Procesit të Berlinit në Tiranë. BE-ja qëndron krah Shqipërisë për të konsoliduar progresin e arritur, thellimin e transformimit të vendit dhe shtyrjen për reforma të rëndësishme që do ta sjellin Shqipërinë në BE”, shkruan ambasadori.
Kujtojmë se Soreca ka shërbyer si ambasador në vendin tonë për tri vite e shtatë muaj. Ai erdhi në Tiranë në shtator të vitit 2018, për t’u larguar në prill të 2022./Opinion.al
