Lindja e Mesme po kalon një kohë ku luftrat kanë shpërthyer në disa fronte.
Njerëz të pafajshëm kanë humbur jetën nga bombardimet e shumta.
Për të folur lidhur me këtë situatë në Lindjen e Mesme, me fokus kryesor në luftën Iran-Izrael, eksperti i zhvillimeve ndërkombëtare, Geron Kamberi, në një bisedë në studion e Klan News, me gazetarin Drini Zeqo u shpreh se ky rajon ka një historik të vjetër konfliktesh.
“Rajoni i Lindjes së Mesme është një rajon që ka një historik të gjatë konflikti dhe kush ka edhe mosha më të vjetra e dinë që në atë rajon nuk ka pasur asnjë periudhë të qetë përgjatë gjithë kohës, veçanërisht pas Luftës së Dytë Botërore”,u shpreh Kamberi.
Kambëri ndër të tjera është ndalur edhe tek roli i Europës në konfliktet në Lindjen e Mesme, për të cilën tha se ka pasur një rol të vakët.
Sipas tij Europa edhe pse përpiqet të japë sinjale se është pjesë e shqetësimit për këto konflikte, ndërhyrja e saj ka qenë kryesisht pas vendosjes së paqes nepërmjet programeve të ndihmave.
“Natyrisht që ka ndikim. Europa po përpiqet të japë një sinjal që është edhe ajo pjesë e shqetësimit dhe zgjidhjes, por për hir të szë vërtetës ndoshta kjo mund të mos jetë diçka e pëlqyeshme, Europa ka treguar që në konfliktet në Lindjen e Mesme ka pasur një rol shumë të vakët.
Më shumë është përfshirë aty, pasi ka ndodhur paqja dhe ka hyrë me ato instrumentat e fuqisë së butë siç janë programet e ndihmës, zhvillimi i arsimit dhe infrastrukturës”, theksoi Kamberi.
Ndërkohë në fjalën e tij, eksperti Kamberi theksoi se konflikti ushtarak mes Iranit dhe Izraelit është e vështirë të ndodhë, kjo sipas tij për shkak të largësisë gjeografike.
